December 28

raVen

Registered
Aug 24, 2019
3
0
1
Barish k katray ous k surd raweay ke tarha khoon ko munjamid karnay lagay. Qadam janay kahan ja rahay thay, qayas na tha. Bus zehan o rooh may ous ke baatain baz gasht kar rahe theen. Ek anjana sa dharka dil k durr daraz tareek konay may panap raha tha. Gul o gulzar may liptay ous k khusbu bharay narm alfaz aj kaisay itnay teekhay ho gaey, mai samajh nai paa raha tha. Aj ous ka khat phir aya tha aur unwan akhri khat tha. Aik bund dukan k shade k nechay kharay ho kar, bay tar teeb hoti hue dharkano k sath ous ka aya hua wo akhri khat nikala.

Ali,

""Mai janti hu k tum yeh khat parh kar sakhat taish mai ao gay. Please mayre baat dheyan say suno. Aj say pehlay shayad mai apni mohabat tum pay waazay na kar saki aur shayad hamesha ke tarha tumhay aj bhe for granted he lu ge. Humari mulakat k pehlay din say mai tumhay yehe bawar karwati aye hu k hum achay dost hain aur iss say agay barh k aur kuch nahi. Mai tumharay khoon o rooh mai busti hon Ali aur tumhay control karna bohut ba khoobi janti hu, gusa na karo aur please ghaur say mayre baat suno." Badalon ke ghun garaj may mazeed shidat aa gaey aur barish dil ke dharkano ke tarha taiz honay lagi.

"Mai nay tum say ahad leya tha k hum kabhe na mil sakain gay aur janti hu k tum nay bohut itmenan say sabar keya. Kaye dafa aisa bhe hua k tum jhungla uthay, bohut se frustration ka shikar bhe huay, laken phir shayad humaray ahad ya mayre larki honay k sath jo majburian wabasta hain oun ke pas dari kartay huay khamosh ho gaey aur hum phir say agay chal partay thay. Wakt kum milnay ka shikwa karta thay,per yakeen karo k Ali k mayra her ek pul tumhari yaad may guzarat hai. Tum khul k apnay dil ke her baat mujhay keh daltay thay aur mai oun baton k khumari may din raat rehte thee. Han Mai nay tum say kaha tha k hum nahi milain gay. Badalon nay aik bar phir garaj k apni maujadgi ka ehsas dilaya. Apnay ird girz nazar ghuma k dekha tou her cheez jaisay dhundli hoti ja rahe thee." Ous ke tehreer may kahi batain sayan sayan kartay huay mayray andar pavest hoti ja rah theen.

"Tumhay yad hai jub mai nay tum say mazak keya tumhay galat jaga bulwa k? Mai nay tum say kabhe sorry nahi keya tha, laken sorry bohut galat mazak keya., aj tak mai nay tum say jo kaha tum nay wo keya aur iqrar karte hu k tum nay wohe keya jo mai nay tum say karwana chaha, baad may mujhay khud bhe bohut dukh hua jub mai nay tumhay galat jaga bulwaya. Mai tumhari hu aur sirf tumhari bun k rehna chahte hu laken samjho k yeh dushwar he nahi bulkay na mumkin hai. Jis din mai nay tum say kaha tha k kabhe mujhay milnay, mujhay dhondnay aur panay ke koshish na karna,tou aj mai he tumhay kehte hu, k dhond lo mujhay Ali. Mai tum say dur ja rahe hu. Ager mujhay hasil kar saktay ho tou kar lo Ali. Zindagi k kisi mor pay moka mila tou tumhay msg karu ge. Apni sim tor rahe hu han laken skype say mai tumhay nahi nooch sakti. Mai ja rahe hu. Bohut jald tum mayre awaz nahi sun sako gay, aur jo bahanay say mai apni tasaveer tumhay bhejte hu wo bhe nahi ayan ge. Han janay say pehlay aik akhri tasveer bheju ge takay tumharay zehan per mai he naksh rahu, mai he raj karu. Bijlian karak rahe theen aur oun ke hararat mai apnay andar mehsus kar sakta tha. Hawa may yukh bastagi barhte chali ja rahe thee. Mujhay apnay qadam baraf hotay mehsus huay.

Ma ja rahe hu aur sirf tumhay aik tareekh bata rahe hu. 28 December, Daewoo. Iss say agay tum na puchna aur na mai bata sakte hu. Mai nay tum pay andha trust keya laken phir bhe tumhay apna asal naam nai bataya. Mayray naam k haroof A K hain. Tor do mayra ahad aur aa jao, mai ja rahe hu Ali .....

(Bakia Ainda) ......
 

Advertisement